Aruba presente durante sesion di Comite di Derecho di Mucha di NacionnanUni na Geneve

By May 8, 2015Noticia

Riba 27 mei ultimo, durante un sesion di e Comite di Nacionnan Uni di Derecho di Mucha na Geneve, Reino Hulandes a wordo evalua riba e tereno di Derecho di Mucha. E sesion aki tabata basa riba un rapport di Reino entrega na Nacionnan Uni na 2013. E Comite di experto di Nacionnan Uni ta supervisa e cumplimento cu e Tratado di Derecho di Mucha.

Un delegacion di Aruba tabata presente na Palais Wilson,formando parti di e delegacion di Reino Hulandes. E delegacion di Aruba a wordo encabeza pa Minister di Asuntonan Social, Maneho di Hubentud y Labor, drs. Paul Croes y tabata consisti ademas di mr. drs. Marushka Tromp, Consehero di Minister,Sacha Geerman, M.A.di Departamento di Asuntonan Social y mr. Olivia Croes di Departamento di Relacionnan Exterior.

Den su introduccion Minister Croesa informa cu Aruba, siguiendo recomendacionan anterior di e Comite, a adopta un plan integral di maneho pa cu Hubentud. E plan aki ta pone enfasis riba areanan esencial pa cu e desaroyo di e mucha, manera su ambito familiar y escolar, tempo liber y recreo sano y participacion di e hoben. A duna credito den e cuadro aki tambe na UNICEF pa e analisis realisa riba e situacion di mucha y adolesente na Aruba. Na 2014 e Comision Nacional di derecho di mucha a wordo re-activa pa duna un impulso nobo na e coordinacion y implementacion di e tratado. Na nivel di Reino tin un Task Force estableci pa promove cooperacion entre paisnan den Reino riba e tereno di derecho di mucha.
Minister a sigui menciona cu prevencion y combatimento di abuso di mucha ta halto riba agenda di gobierno. Tambe ta trata di fomenta participacion door di crea conhuntamento cu NGO’s y sector priva e posibilidadnan pa e hubentud por envolvi su mes mas den trabounan boluntario y otro actividadnan sano. Gobierno a laga Universidad di Aruba haci un estudio pa yega na un mihor comprondemento di loke ta biba bou di nos hobennan.Aruba ta den proceso tambe pa yega na un asina yama ‘Youth Monitor’ na unda lo tin data actual y uniforme centralisa pa uso den maneho y  monitoreo di e situacion di mucha na Aruba.

Despues di e introduccion, Minister Croes a bai over na contesta preguntanan cu ta regarda e situacion di derecho di mucha na Aruba. E Comite a lansa pregunta riba e cumplimento den ley y maneho pa cu e diferente articulonan ancra den e tratado.Asina por menciona cu Aruba a ricibi entre otro pregunta riba institutonan nacional di derecho humano cu ta garantisa y vigila e cumplimento cu e tratado, e ley di proteccion di maternidad y dunamento di pecho na pia di trabou, proyecto y programanan pa combati obesidad infantil, e situacion di embaraso hubenil, programa pa cu uso di droga y adiccion bou di hobennan y e cantidad di muchanan cu ta biba cu HIV/AIDS. A elabora riba e ley di enseñanza obligatorio y su ehecucion. Na 2014 a bin cu cambio den e Codigo Penal, unda a bin cu un regimen nobo pa cu hobennan cu haña nan mes den problema cu husticia. Tambe a indica cu tin un concepto di ley cu ta prohibi castigo corporal di mucha den seno familiar.

Proteccion y cumplimento di Derecho di Mucha ta un proceso continuo cutin su retonan y gobierno di Aruba ta habri pa sosten internacional pa mehora su cumplimento. Dene cuadro aki Aruba lo traha riba e recomendacionnan cu bin padilanti.

Ta bon pa menciona cu e sesion a dura un dia completo y cu esaki a rekeri un preparacion intensivo. E ultimo rapport di Aruba a wordo traha na 2012 door di Departamento di Relacionnan Exterior den consulta cu diferente instancia gubernamental y no-gubernamental. E Comision Nacional di Derecho di Mucha re-instala na October 2014 a duna su aporte na e contestanan cu mester a baypor escrito na e Comité Internacional prome cu e sesion. Reunionnan teni den e Comision Nacional di Derecho di Mucha a trece informacion nobo y relevante padilanti cu a contribui na e dialogo constructivo cu a tuma lugar na Geneve.

Leave a Reply