Noticia

Bondia: Comision di Derecho di Mucha a lansa website nobo pa brinda informacion na comunidad

By October 27, 2017 No Comments

E Comision ‘Derecho di Mucha’ a lansa un pagina di web pa asina yuda informa comunidad riba diferente area relaciona cu e tema di derecho di nos muchanan na Aruba.  Por medio di un comunicado di prensa nan ta informa lo siguiente.

Tratado di ‘Derecho di Mucha’
Na aña 1989 paisnan a yega na un acuerdo den un asamblea general di Nacionnan Uni cu globalmente mester salvaguardia e bienestar di tur muchanan cu e Tratado Derecho di Mucha. Muchanan a sufri hopi di e consecuencianan di e prome y segunda guera mundial. Paisnan rond mundo a bisa cu esaki no por pasa mas. Tambe a mira e necesidad pa bin cu un documento specifico cu ta regla e derechonan di mucha cu ta den un etapa vulnerabel di crecemento y mester di extra proteccion.  Na aña 2001 Aruba tambe a firma e tratado aki, haciendo asina e compromiso pa proteha di un forma mas completo posibel di e mucha por medio di e diferente articulonan specifica den e tratado. Pa percura cu e cumplimento cu e tratado ta sosode na un forma coordina y eficiente, gobierno di Aruba a instala e Comision Derecho di mucha riba 12 di april 2001. E comisión tabata activo te cu aña 2009.

Na luna di oktober 2014 e comision di Derecho di mucha a keda reinstala cu tres tarea specifico:

  1. Conseha gobierno riba implementacion di e Tratado
  2. Ehecucion di e responsabilidad internacional pa raporta encuanto e tratado
  3. Concientisa e comunidad tocante e derechonan di mucha

E comision Derecho di mucha lo ta presidi por medio di Departamento di Asunto Social y ta consisti di representacion di Directie Buitenlandse Betrekkingen, Directie Voogdijraad, Bureau SosteneMi, Departamento di Enseñansa, Departamento di Salud Publico, Departamento di Labor, Oficina Central di Estadistica, Asociacion di Trabao di Hubentud y CEDE Aruba.  E comision a traha riba e raportahe internacional cu a ser trata na juni 2015 na Geneve. Cu e ciclo di raportahe ey tras di lomba e comision a enfoca siguientemente riba e dos otro tareanan, esta pa conseha gobierno riba e implementacion y conscientisa e comunidad.
Articulonan den tratado
E tratado derecho di mucha ta consisti di 54 articulo cu ta cubri diferente area, entre otro salubridad, enseñansa y husticia. Pa duna un ehempel, art. 29-30 ta stipula cu e derecho riba enseñansa tambe ta consisti e derecho pa desaroya e personalidad, talentonan y habilidad mental y fisico di e mucha. Manteniendo bista riba e derechonan humano general y respet pa e.o. nan identidad, idioma y religion.
Tur esaki tambe pa prepara e mucha pa por biba un bida responsabel den un sociedad liber.

Pa por duna informacion na comunidad na un manera mas efectivo, e comision a lansa e website: www.derechodimucha.org

Riba e website por haya tur informacion tocante e articulonan den e tratado na tres diferente idioma, Papiamento, Hulandes y Ingles. Por lesa tambe e raportahenan di Nacionnan Uni y e recomendacionnan cu Aruba a ricibi. Cu e lansamento di website e comision ta spera di por a haci e acceso mas facil pa tur hende.