Diario: Comision Derecho di Mucha lo sigui traha duro pa salvaguardia derecho di mucha y concientiza pueblo riba esaki

By October 27, 2017Noticia

ORANJESTAD(AAN): Durante lanzamento oficial di e poster y website di Comision Derecho di Mucha, presidente di e comision Sasha Geerman a duna un splicacion riba e tratado cu ta regarda derecho di mucha.

Segun señora Geerman, na 1989 paisnan rond di mundo a dicidi cu e situacion di muchanan rond di mundo no por keda asina.

E intencion tabata pa mehora e situacion pa e muchanan, sigur despues di Prome y di Dos Guera Mundial, caminda cu hopi mucha a perde nan bida y a pasa den momentonan hopi traumatico.

Paisnan a uni den esaki, pa salvaguardia derechonan di mucha.

Asina nan a yega na forma e tratado pa derecho di mucha.

“Mester bisa cu no ta un proceso facil pa yega na un tratado, pasobra ta purba documenta cada palabra, frase y intencion mas exacto cu ta posibel”.

“Esaki a sosode y mayoria pais rond mundo a firma e tratado”.

“Na momento cu un pais firma e tratado, e ta compromete su mes tambe pa cumpli cu esaki”.

Esaki segun presidente di Comision Derecho di Mucha, kende a sigui bisa cu esey no kiermen cu e pais tin tur cos regla, pero si e ta mustra su disponibilidad pa por yega na cumpli cu tur e derechonan cu ta ancra den e tratado.

Na 2001 Aruba tambe a firma e tratado y na e momento ey mesora gobierno a instala un comision, cu a traha di 2001 te 2009 y a hasi un tremendo trabao.

Awor e intencion ta pa sigui traha duro riba derecho di mucha.

E comision tin tres tarea, esta conseha Gobierno riba implementacion di e tratado aki na Aruba, raporta internacionalmente  na Nacionnan Uni con Aruba ta progresando den implementacion di e tratado y tambe concientiza comunidad riba existencia di e tratado y e 54 articulonan cu tin den e tratado.

Leave a Reply