Noticia

Diario: Fundacion Telefon pa Hubentud Aruba coordinando Unicef Kinderrechten Filmfestival

By February 16, 2018 No Comments

ORANJESTAD (AAN): For di 1999 caba Fundacion Telefon pa Hubentud Aruba ta para pa e derecho di cada mucha aki na Aruba.  Asina por corda por ehempel ariba ‘Esaki ta bo Derechonan’ cu ta un proyecto cu Fundacion Telefon pa Hubentud Aruba a presenta na aña 2001.

Fundacion Telefon pa Hubentud Aruba ta un organizacion cu ta traha cu otro organizacionnan local e internacional, pa salvaguardia e derechonan di nos muchanan.

E aña aki no ta un excepcion. Fundacion Telefon pa Hubentud Aruba a ser acerca door di Unicef Hulanda pa ta coordinador di Unicef Kinderrechten Filmfestival Aruba.

E proyecto aki ya caba ta worde organiza na e islanan Bonaire, Saba y Sint Eustatius. E aña aki Aruba Curacao y Sint Maarten tambe lo ta participando na e proyecto aki. E obhetivo di e proyecto ta pa e muchanan siña conoce nan derechonan y siña expresa esaki na un bon manera. Door di conoce nan derechonan, nan ta siña cu otro persona tambe tin derecho mescos cu   nan.

Na Aruba tin 5 school cu lo participa na e proyecto aki. Esakinan ta: Colegio Santa Famia, Colegio Santa Filomena, Mon Plaisir Basischool, Prinses Amalia Basisschool y Puis X School. E schoolnan aki lo participa cu nan klasnan 4, 5 y 6.

E proyecto ta consisti di diferente parti. Primeramente e docentenan di e schoolnan ariba menciona lo ricibi un training tocante e materia di derecho di mucha. Despues e alumnonan lo ricibi un les tocante e derechonan di mucha for di nan docentenan. Despues cu e muchanan ricibi e les tocante nan derechonan, nan lo haci un pintura tocante un di e derechonan.

Esaki por ta e derecho cu nan gusta mas, of e derecho cu pa nan ta mas importante of esun cu nan tin mas pregunta riba dje. Ora e pinturanan ta cla, un exposicion lo ser organiza na e school. Durante e exposicion lo saca un ganador di cada klas, pa despues saca un ganador di cada school.

Un ‘filmcoach’ (CineAruba y Armando Goedgedrag) hunto cu e alumnonan di e klas di e pintura ganador lo traha un pelicula. E basis di e pelicula ta e pintura ganador. Ora cu e peliculanan di tur e cinco  schoolnan ta cla, un anochi di ‘première’ lo worde organiza.

Durante e anochi aki tur e muchanan di e klasnan cu a gana hunto cu nan mayornan lo ta presente. Tur e peliculanan lo worde presenta y na final lo kies un pelicula ganador. E pelicula ganador aki hunto cu tur e alumnonan di e klas ganador lo participa na e ‘Unicef Kinderrechten Filmfestival’ regional na Curacao ariba 14 di april.

Eynan nan lo competi cu e alumnonan di Curacao, Sint Maarten, Bonaire, Saba y Sint Eustatius.  E pelicula di e pais cu gana lo representa su pais durante e International Film Festival Rotterdam 2018.

Pa medio di un proyecto asina Fundacion Telefon pa Hubentud Aruba hunto cu Unicef Hulanda lo sigui duna e muchanan di Aruba informacion tocante nan derechonan y salvaguardia esakinan.